АД РЭДАКЦЫІ
Рэдакцыйныя стандарты падрыхтоўкі матэрыялаў, прынцыпы працы з аўтарамі, крыніцамі і аўдыторыяй застануцца нязменнымі.
Рэдакцыя LSM+
(раней — Rus.LSM.lv)
Сёння, 12 жніўня, на партале грамадскіх СМІ LSM.lv запушчаны новы раздзел — LSM + (Plus.LSM.lv). У ім даступныя для прагляду, праслухоўвання і чытання ўсе матэрыялы грамадскіх СМІ Латвіі на іншых мовах — навіны, аналітычныя матэрыялы і ўнікальныя гісторыі на англійскай, рускай, украінскай, беларускай і польскай мовах.
Для пашырэння аб’ёму зместу на іншых мовах Латвійскае тэлебачанне стварыла новы брэнд LSM+, які аб’ядноўвае ўжо існы кантэнт Rus.LSM.lv для меншасцяў, вылучаючы і спрашчаючы пошук у раздзелах на ўкраінскай, беларускай і польскай мовах, а таксама кантэнт Eng.LSM.lv — дакладныя і якасныя навіны з Латвіі для міжнароднай аўдыторыі.
Знак «+», дададзены да брэнду LSM, сімвалізуе дадатную вартасць партала грамадскіх СМІ: разнастайны і багаты кантэнт на розных мовах, даступны ўсім без абмежаванняў, гаворыцца ў паведамленні LTV.
«Мэта і задача грамадскіх СМІ — у тым ліку забяспечваць эфектыўную і мэтанакіраваную камунікацыю з людзьмі іншых нацыянальнасцяў, уключаючы і латвійскія нацменшасці, утрымліваць аўдыторыю меншасцяў Латвіі ў латвійскай інфармацыйнай прасторы, аператыўна і зручна падаючы дакладную і разнастайную інфармацыю. Да гэтага часу самы багаты кантэнт для носьбітаў іншых моў ствараўся на рускай і англійскай мовах. Уводзячы гэтыя змены, мы мэтанакіравана пашыраем прапанову на іншых мовах, прыцягваючы да супрацоўніцтва журналістаў і рэдактараў, якія не толькі ўмеюць ствараць кантэнт на ўкраінскай, беларускай і польскай мовах, але і знаёмыя з латвійскім асяроддзем і грамадствам, што вельмі важна для забеспячэння высокай якасці кантэнту грамадскіх СМІ. Чытачы звернуць увагу, што публікацый на ўкраінскай, беларускай і польскай мовах на партале зараз менш, чым на іншых мовах, але мы маем намер і далей вырашаць задачы па прыцягненні аўтараў і вытворчасці кантэнту, каб усе зацікаўленыя маглі атрымліваць усё больш актуальнай і дакладнай інфармацыі», — прыводзяцца ў паведамленні LTV словы старшыні праўлення Латвійскага тэлебачання Іварса Прыедэ.
«LSM+ адкрывае для грамадскіх СМІ магчымасці дадаваць у існую сям’ю моў змест і на дадатковых мовах», — удакладняе І. Прыедэ.
Партал грамадскіх СМІ Латвіі LSM створаны ў 2013 годзе. У статыстычным Топ-20 самых наведвальных інтэрнэт-старонак Латвіі, які складае служба Gemius, LSM.lv са сярэднямесячнай аўдыторыяй у 700 тыс. стабільна трымаецца ў першай тройцы навінавых парталаў.
